གབ་པའི་ཚ་བ་ནི་ཚ་བ་མེ་ལྟ་བུའི་ངོ་བོ་ལ་ཕྱི་ནས་ཐལ་བ་གྲང་མོས་གཡོགས་ནས་སྦས་པ་ལྟར་གྲང་རླུང་གཉིས་ཀྱིས་མགོ་བྱིབས་ནས་བག་ལ་ཉལ་བ་གབ་པའི་ཚ་བ་ཡིན། གབ་པའི་ཚ་བའི་ངོ་བོ་ནི་ཐལ་བ་གྲང་མོའི་ནང་དུ་སྦས་པའི་མེ་དང་འདྲ་སྟེ། གྲང་བ་དང་རླུང་གཉིས་ཀྱིས་ཚ་བའི་མགོ་བྱིབས་པས་བད་རླུང་གི་འོག་ཏུ་ཚད་པའི་རྟགས་བག་ལ་ཉལ་བའོ།

རྩ་ཆུ་ཕྱི་ཡུལ་དུ་ཚ་རྟགས་སྟོན་ཀྱང་སྦུད་པ་གྲང་ཡང་མེ་ཡི་གྲོགས་སུ་འགྱུར་བ་བཞིན་ངོ་བོ་རླུང་གིས་ཚ་བ་བུས་པའི་ཚད་པའི་མིང་།།

རྒྱས་ཚད་ནི་བད་ཀན་དང་།རླུང་སོགས་ནད་གཞན་གྱི་བསྡོངས་ཟླ་དང་བྲལ་ནས་ཚ་བ་རྐྱང་པའི་སྟོབས་ཆེས་ཆེར་རྒྱས་ཤིང་ལུས་ཟུངས་སྲེག་པར་བྱེད་ཕྱིར་རྒྱས་བའི་ ཚ་བ་ཞེས་བྱའོ།

མ་སྨིན་ཚ་བ་ནི་ཚ་བ་བད་རླུང་གི་བསྡོངས་ཟླ་དང་བཅས་པས་རླུང་གིས་ཚ་བ་ལུས་ཟུངས་ལ་ཁྱབ་པར་བྱེད་བ་དང་། བད་ཀན་གྱིས་ཚ་བའི་མགོ་མནན་ནས་ནད་ཤུགས་མ་རྫོགས་པ་སྟེ། ཚ་བ་བད་རླུང་གི་བསྡོངས་ཟླ་དང་མ་ཕྱེད་པས་ནད་ཤུགས་མ་རྫོགས་པ་དང་ཆེར་སྐྱེ་བའི་འཕྲོ་འང་མ་ཆད་པའི་གནས་སྐབས་ལ་བྱའོ།