༄༅།།《བོད་ཀྱི་གསོ་རིག་དཔལ་ལྡན་རྒྱུད་བཞི་ཞེས་བྱ་བ་བཞུགས་སོ》ཞེས་པ་དཔེ་སྐྲུན་བྱས།
ཡོང་ཁུངས། | ཀློག་གྲངས།
དེ་ཡང་རང་རེའི་གསོ་དཔྱད་ཀྱི་བསྟན་པ་འཛིན་པའི་སྐྱེས་ཆེན་དམ་པ་མང་པོའི་ཐུགས་བསྐྱེད་དང་འབད་བརྩོན་ལ་བརྟེན་ནས་རྒྱུད་བཞི་ལ་ཡང་སྦྱོར་རའི་པར་མ་དང་། མངའ་རིས་ཀྱི་པར་མ། སྒམ་པོའི་པར་མ། རྟག་བརྟན་ཕུན་ཚོགས་གླིང་གི་པར་མ། ཨེ་རོང་ཆ་དཀར་པར་མ། པོ་ཏ་ལའི་པར་མ་དང་པོ། པོ་ཏ་ལའི་པར་མ་གཉིས་པ། དིང་རིའི་ཤེལ་དཀར་པར་མ། སྡེ་དགེ་པར་མ་དང་པོ། སྡེ་དགེའི་པར་མ་གཉིས་པ། སྐུ་འབུམ་བྱམས་པ་གླིང་གི་པར་མ། བླ་བྲང་བཀྲ་ཤིས་འཁྱིལ་གྱི་པར་མ། ལྕགས་པོ་རིའི་པར་མ། པེ་ཅིན་གྱི་པར་མ། ནང་སོག་ཐུ་མེད་ཀྱི་པར་མ། འབྲུག་ཡུལ་གྱི་པར་མ་དང་པོ། འབྲུག་ཡུལ་གྱི་པར་མ་གཉིས་པ། ཕྱི་སོག་ཁལ་ཁའི་པར་མ། ཨུ་རུ་སུའི་ཨ་ཀོའི་པར་མ་སོགས་པར་གཞི་མི་འདྲ་བ་མང་པོ་བཞུགས། ཐེངས་འདིར་རྫོང་སར་བློ་གྲོས་བོད་སྨན་ཞིབ་འཇུག་ཁང་གིས་བསྒྲིགས་པའི་རྒྱུད་བཞི་སྡེ་དགེའི་པར་མ་དེ་སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་འགྲེམ་སྤེལ་བྱས།
སྤྱིར་ལོ་རྒྱུས་སྟེང་རྒྱུད་བཞི་སྡེ་དགེའི་པར་མ་ལ་གཉིས་ཡོད་དེ། པར་མ་དང་པོ་ནི་སྡེ་དགེའི་ཁྲི་རབས་ལྔ་པ་བླ་ཆེན་བསོད་ནམས་ཕུན་ཚོགས་ཀྱིས་ཟུར་མཁར་བློ་གྲོས་རྒྱལ་པོས་ཞུས་དག་མཛད་དེ་པར་དུ་བསྒྲུབས་པའི་གྲ་ཐང་པར་མ་ལས་ཕྱི་མོ་འབྲུ་ལེན་བྱས་ནས་པར་ཞུས་མཛད་ཅིང་པར་བྱང་བསྩལ་ཏེ། སྡེ་བཞི་དགེ་བཅུའི་དཔལ་གྱིས་མངོན་པར་མཐོ་བའི་ལུགས་བརྒྱའི་འདུན་ས་དཔལ་ལྡན་ལྷུན་གྲུབ་སྟེང་གི་ཆོས་གྲྭ་ཆེན་པོར་པར་དུ་བསྒྲུབས་ནས་བཞུགས་སུ་གསོལ་ཡང་རྐྱེན་དུ་མའི་དབང་གིས་དེང་སྐབས་མཇལ་དུ་མེད་པར་གྱུར་འདུག་སྐད།
པར་མ་གཉིས་པ་དེ་སྡེ་དགེའི་ཁྲི་རབས་དྲུག་པ་ཆོས་རྒྱལ་བསྟན་པ་ཚེ་རིང་མཆོག་གིས་སྤྱི་ལོ༡༧༣༣ལོར་མི་དབང་པཎྜི་ཏ་སྡེ་སྲིད་སངས་རྒྱས་རྒྱ་མཚོས་ཞུས་ཆེན་མཛད་པའི་པོ་ཏ་ལའི་པར་མ་ལས་ཕྱི་མོ་འབྲུ་ལེན་བྱས་ནས་པར་ཞུས་མཛད་ཅིང་པར་བྱང་བསྩལ་ཏེ། སྡེ་བཞི་དགེ་བཅུའི་དཔལ་གྱིས་མངོན་པར་མཐོ་བའི་ལུགས་བརྒྱའི་འདུན་ས་དཔལ་ལྡན་ལྷུན་གྲུབ་སྟེང་གི་ཆོས་གྲྭ་ཆེན་པོར་པར་དུ་བསྒྲུབས་པས་དུས་ད་ལྟའི་བར་དུ་མ་ཉམས་པར་ཡུལ་གངས་ཅན་པའི་འགྲོ་བའི་བསོད་ནམས་ཀྱི་བགོ་སྐལ་དུ་བཞུགས་ནས་འགྲོ་དོན་འཕྲིན་ལས་བསམ་གྱིས་མི་ཁྱབ་པར་བྱུང་དང་འབྱུང་བཞིན་ཡོད་པ་ལགས་སོ།།
