བདུད་རྩི་སྨན་གྱི་རྣམ་དབྱེ་ནུས་མིང་རྒྱས་པར་བཤད་པ་དྲི་མེད་ཤེལ་ཕྲེང་ཞེས་བྱ་བ་འདི་ནི་ཕུལ་དུ་བྱུང་བའི་སྔོ་འབུམ་སྐད་གྲགས་ཅན་དེ་ཡིན་པར་ཀུན་གྱིས་ཁས་བླངས་དོན་ཐོག་ཏུ་གསལ་བ་ལས་ཁྱད་ཆོས་མང་པོ་ཡོད་ཀྱང་མདོར་བསྡུས་ན། གཅིག་སྐྱེ་དངོས་དང་། སྲོག་ཆགས། གཏེར་རྡོའི་སྨན་མཐའ་དག་གི་རོ་ནུས་དང་རང་བཞིན། མངོན་བརྗོད། འཁྲུངས་དཔེ་སོགས་ཞིབ་རྒྱས་སུ་བཀོད་ཡོད་པ་དང་། གཉིས་གོང་གསལ་སྨན་རིགས་རྣམས་ནས་ཁག་གཅིག་ལ་སྔ་རབས་ཀྱི་མཁས་པ་ཚོའི་བཞེད་པ་མི་འདྲ་བས་ངོས་འཛིན་གཅིག་གྱུར་མེད་པ་སྔར་རྒྱའི་རི་བོ་རྩེ་ལྔ་དང་། འཇང་ཡུལ། ཡུན་ནན། རྒྱ་གར། ལྷ་ས། གནམ་མཚོ། མདོ་ཁམས་སོགས་ལ་ཕེབས་དུས་ཁོང་རང་ངོ་མས་འདྲི་བརྩད་དང་། བརྟག་དཔྱད་གནང་བ་རྣམས་ལུང་རིགས་དཔྱད་པ་གསུམ་གྱིས་གཏན་ལ་ཕབ་སྟེ་ཚད་ཐུབ་ཁུངས་དང་བཅས་པས་གསལ་བཤད་གནང་ཡོད། གསུམ་སྨན་རྫས་རྣམས་སྡེ་ཚན་བཅུ་གསུམ་དུ་ཕྱེ་ནས་བྱེ་བྲག་ནང་གསེས་ལ་རྩ་བའི་སྨན་རིགས་རྣམ་གྲངས་ཆིག་སྟོང་ཆིག་བརྒྱ་དོན་དྲུག་དང་། ནང་ཚན་རིགས་དབྱེའི་རྣམ་གྲངས་ཉིས་སྟོང་ཉིས་བརྒྱ་གོ་བཞི་སོགས་ཡོད་པས་བདུད་རྩི་སྨན་གྱི་རྣམ་དབྱེ་ནུས་མིང་རྒྱས་པར་བཤད་པའི་སྨན་གཞུང་ཚད་ལྡན་ཞིག་ལགས།