ལེའུ་བཅུ་གཅིག་པ། གཅོང་ཆེན་ཟད་བྱེད་བཅོས་པ།
ཡོང་ཁུངས། ཀྲུང་གོའི་བོད་ཀྱི་གསོ་རིག | ཀློག་གྲངས།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག གློ་གཅོང་ཆེན་པོ་ཟད་བྱེད་རྒྱུ་དང་ནི། །དབྱེ་བ་རྟགས་དང་དེ་ཡི་བཅོས་ཐབས་བཞི། །རྒྱུ་ནི་བཤང་གཅི་ཕྱེན་དབུགས་བཀག་པ་དང༌། །དྭངས་མ་ལ་སོགས་ལུས་ཟུངས་སྣུམ་ཟད་དང༌། །དྲག་ཤུལ་ཟས་སྐོམ་མི་མཐུན་བསྟེན་པ་ཡིས། །རླུང་མཁྲིས་བད་ཀན་ཉེས་པ་འཁྲུགས་གྱུར་ཏེ། །ལུས་ཀུན་ཁྱབ་ཅིང་བུ་ག་འཁྲུག་པ་དང༌། །མེ་དྲོད་ཉམས་པས་དྭངས་མ་མ་སྨིན་ཏེ། །དྲི་མར་གྱུར་པས་ལུས་ཟུངས་ཟད་པར་བྱེད། །དེ་ཕྱིར་གཅོང་ཆེན་ཟད་བྱེད་ཅེས་བྱར་བཤད། །དབྱེ་བ་རླུང་མཁྲིས་བད་ཀན་རྣམ་གསུམ་སྟེ། །གཅོང་ཆེན་ནད་ཀྱི་བླ་གཉན་དྲུག་ཏུ་བཤད། །དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་དང་པོ་བར་དང་ཐ་མ་གསུམ། །དང་པོ་སྔར་ཚུལ་ཆམ་འདེབས་སྦྲིད་པ་མང༌། །ཁ་མངལ་ཉམ་སྟོབས་ཞན་ལ་མེ་དྲོད་ཆུང༌། །ཟོས་ཀྱང་སྟོབས་མེད་སྙིང་འཕར་དང་ག་ཞན། །སྐྱུག་འདོད་རྐང་བོལ་གདོང་སྐྲངས་མིག་མདངས་དཀར། །བུད་མེད་ཆང་དང་ཤ་ལ་ཤིན་ཏུ་སྲེད། །མགོ་རྐང་ཉི་མ་མི་བཟོད་འགེབས་པར་བྱེད། །ཟས་སྐོམ་རྔུལ་འདུ་སྐྲ་དང་སེན་མོ་རིང༌། །རྨི་ལམ་མི་བཟང་སྣ་ཚོགས་མཐོང་བར་འགྱུར། །དེ་རྗེས་བར་དུ་གཅོང་ཆེན་སྟོད་ན་གནས། །ཆམ་འདེབས་ལུད་པ་མང་ལ་དབུགས་མི་བདེ། །ཕྲག་པ་མགོ་ན་སྐད་འགག་ཡི་ག་འཆུ། །སྨད་དུ་གནས་ན་ཕོ་བ་རྒྱུ་ལོང་འབབ། །སྐྱུག་ཅིང་འཁྲུ་འམ་རྟུག་སྐམ་ནད་དུ་འགྱུར། །བར་ན་གནས་ན་རྩིབ་ལོགས་གཟེར་ཟུག་བྱེད། །ཚིགས་གཞིར་གནས་ན་རིམས་ཀྱིས་འདེབས་པ་སྟེ། །དེ་ལྟར་གཅོང་ཆེན་ནད་ཚུལ་བཅུ་གཅིག་ལྡན། །བྱེ་བྲག་རླུང་གྱུར་ཀླད་པ་རྩིབ་ལོགས་ན། །ཡན་ལག་ན་འགྱུར་སྐད་འགགས་མགུལ་པ་སུབ། །མཁྲིས་གྱུར་རྐང་ལག་ཕྲག་པ་ཚ་བ་དང༌། །འཁྲུ་སྐྱུག་ཁ་སྣ་རིམས་ཀྱིས་ཐེབས་འདྲ་ན། །བད་ཀན་ལུས་ལྕི་སྐྱུགས་ཅིང་ཡི་ག་འཆུ། །མཆིལ་སྣབས་མང་ལ་ཆམ་འདེབས་མེ་དྲོད་ཉམས། །གཅོང་ཆེན་གནོད་པ་མ་ཞུ་འཁྲུ་དང་སྐྱུག །ཆམ་པ་ལུད་པ་སྐད་འགགས་ཡི་ག་འཆུ། །དེ་དག་གཅོང་ཆེན་ནད་ཀྱི་བླ་གཉན་ཡིན། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་དང་པོ་སྣུམ་འཆོས་དུགས་བྱས་ལ། །སོ་བྱ་འོ་མ་སྦྱར་བས་རློན་དུ་གཞུག །དུར་བྱིད་དོང་ག་ཀ་ར་མར་སྦྱར་སྦྱང༌། །དེ་རྗེས་དྲོད་སྐྱེད་སྨན་དང་ཟས་སྐོམ་བཏང༌། །ཡིད་དུ་འོང་ཞིང་རླུང་འཇོམས་ཡང་བ་བསྟེན། །འབྲུ་རྙིང་ར་ཡི་འོ་མ་ཤ་ཁུ་མར། །སྤྱང་ཀི་བྱ་རྒོད་སྦྲུལ་དང་བོང་བུའི་ཤ །ཤ་ཟའི་ཤ་ཉིད་གསང་བྱིན་ཟུངས་འཕེལ་མཆོག །ཤེས་ན་སྐྱུག་ཅིང་སྤོང་བས་སྟོབས་མི་སྐྱེ། །འཇམ་རྩི་བཏང་ཞིང་ཤ་ཆང་བུར་མར་བསྟེན། །བྱེ་བྲག་རླུང་གྱུར་གཅན་གཟན་ཆུར་གནས་ཤ །མར་བརྔོས་ཁུ་བ་སྤོད་བྲན་བཏང་བར་བྱ། །ར་ཤ་མར་དུ་བཙོས་པའི་ཁུ་བ་དེ། །པི་པི་ལིང་ངམ་སྒ་འམ་སེ་འབྲུ་འམ། །ནས་ཐུག་དང་སྦྱར་གནོད་པ་དྲུག་སེལ་བྱེད། །མཁྲིས་གྱུར་ཆང་བླུད་འུ་སུ་སྒ་ཐང་བཏང༌། །ཤིང་མངར་དུག་ཉུང་བྱ་ཀྲི་རྒུན་འབྲུམ་དང༌། །མ་ནུ་ཟུར་པ་ཨུཏྤལ་བྱི་ཚེར་བ། །གཟེ་མ་པ་ལ་གོ་སྙོད་པི་པི་ལིང༌། །ཀྱི་ལྕེའི་སྨན་མར་གཅོང་ནད་སེལ་བར་བྱེད། །བད་ཀན་ཚ་བ་ལྔ་དང་ཡ་བཀྵ། །ལྡེ་གུའི་སྨན་མར་གཅོང་ནད་དམུ་སྐྲན་འཇོམས། །ཁྱད་པར་ཆང་རྙིང་དྭངས་མ་མཆོག་ཏུ་བསྔགས། །མདོར་ན་གཅོང་ཆེན་མེ་དྲོད་ཉམས་པ་ཡི། །འཁྲུ་བ་ལུས་ཟུངས་འཇོམས་ཕྱིར་བསྲུང་བ་གཅེས། །འདི་དུས་བཤང་བ་དག་ལ་བརྟེན་པས་ན། །ཚ་འཁྲུའི་སྐབས་བཤད་སྨན་བསྟེན་གསོ་བ་སྦྱར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཅོང་ཆེན་ཟད་བྱེད་བཅོས་པའི་ལེའུ་སྟེ་བཅུ་གཅིག་པའོ།། །།
