རྒྱ་ཡིག་པར་ངོས།
ཁ་པར་པར་ངོས།
མཐོ་རིས་ལྷ་ཡུལ་དུ་སྨན་དཔྱད་དར་ཚུལ།
ཡོང་ཁུངས། བོད་ཀྱི་གསོ་རིག | ཀློག་གྲངས།
དང་པོ། ཐོག་མར་སུས་དྲན་པ།
བསྐལ་པ་བཟང་པོ་འདིར་ཐོག་མར་ལྷ་དང་མི་རྣམས་ཚེ་ལོ་དཔག་ཏུ་མེད་པ་ལ་གནས་ཤིང་དེ་ནས་རྫོགས་ལྡན་ཆེན་པོའི་མཇུག་ཚེ་ལོ་འགྲིབ་ནས་འཆི་བ་ཡོད་པའི་སྐབས་ཤིག་བརྒྱ་བྱིན་ལ་སོགས་པས་འཆི་བ་མེད་པའི་ཐབས་ཚོལ་བ་ན།ལྷ་ཆེན་པོ་ཚངས་པས་འོ་མ་ཅན་གྱི་རྒྱ་མཚོ་བསྲུབས་ན་འཆི་བ་མེད་པའི་བདུད་རྩི་འབྱུང་བར་ཤེས་ནས་ཐམས་ཅད་ཀྱིས་ཐབས་ཚུལ་དུ་མའི་སྒོ་ནས་རྒྱ་མཚོ་བསྲུབས་པར་བྱས་པས་འོ་མའི་སྙིང་པོ་མར་འབྱུང་པ་བཞིན་བཅུད་བཟང་ངན་སྣ་ཚོགས་འབྱུང་བ་འདི་ལྟར།ཐོག་མར་འཇིགས་སུ་རུང་པའི་དུག་ཅན་གྱི་སྐྱེས་བུ་ནག་པོ་བརྩེགས་པ་ཞེས་བྱ་བ་བྱུང་བ།ཚངས་པས་ཧཱུཾ་ཞེས་བརྗོད་པས།རྒྱུ་བའི་དུག་ཁྱི་དུག་ལ་སོགས་པ་དང་།མི་རྒྱུ་བའི་དུག་བོང་ང་སོགས་ལ་ཐིམ།དུག་བཏང་བ་ཁྱབ་འཇུག་གིས་ལྟོས་ནས་མིད་པས་དྲན་པ་ཉམས་ནས་ས་ལ་འགྱེལ་བ་ན།ལྷ་ཆེན་པོས་དེ་ལས་དྲངས་པས་མགྲིན་པར་བཞག་པས་མགྲིན་པ་སྔོན་པོར་གྱུར།དེ་ཕྱིར་མགྲིན་སྔོན་ཅན་དུ་གྲགས།ཡང་རྒྱ་མཚོ་བསྲུབས་པས་ཟླ་བ་བྱུང་ནས་ལྷ་དབང་ཕྱུག་གི་རལ་པའི་ཅོད་པཎ་མཛེས་པའི་རྒྱན་དུ་བྱས།དེ་ནས་པདྨ་ལ་གནས་པའི་དཔལ་མོ་བྱུང་བས་ལྷ་ཁྱབ་འཇུག་གི་ཅུང་མར་བྱས།དེ་ནས་རྟ་མཆོག་རིན་པོ་ཆེ་ཁྱད་དུ་འཕགས་པ་བྱུང་བ་ཁྱབ་འཇུག་གི་བུ་འདོད་ལྷའི་ཆིབས་པ་བྱས་པ་ཆུ་སྲིན་རྒྱལ་མཚན་དུ་གྲགས།དེའི་རྗེས་སུ་ཤིང་ཡོངས་འདུ་བ་བརྟོལ་ལ་སོགས་པ་རིན་པོ་ཆེའི་རིགས་བརྒྱད་དང་བཅས་པ་བྱུང་།ཉི་མས་ཞོན་པའི་ཤིང་རྟ།དེ་འདྲེན་པའི་རྟ་ལྗང་རྣམས་སོགས་བྱུང་བ་ལྷ་རྣམས་ཀྱིས་ཁྱེར།དེ་ཡི་རྗེས་སུ་ཆང་བྱུང་བས་དེ་འཐུང་པས་ར་རོ་བར་གྱུར།དེ་ཡི་རྗེས་སུ་འཆི་མེད་ཀྱི་བདུད་རྩི་སྣ་ཚོགས་སྣོད་ཆེན་པོ་བརྒྱད་གང་བ་བྱུང་བས།ལྷ་མིན་རྣམས་ཀྱིས་ཁྱེར་བས་ལྷ་རྣམས་ཡི་མུག་པའི་ཚེ།ཁྱབ་འཇུག་ནི་བུད་མེད་ཤིན་ཏུ་གཟུགས་བཟང་བར་སྤྲུལ།བརྒྱ་བྱིན་མི་སྣང་པར་བྱས་ནས་ནམ་མཁའ་ན་འདུགདེ་ཡི་ཚེ་ལྷ་མ་ཡིན་རྣམས་ཀྱང་ཁྱབ་འཇུག་བུད་མེད་དུ་སྤྲུལ་པ་དེ་ལ་ཆུང་མར་སེམས་ནས་བདུད་རྩིའི་སྲུང་མར་བཞག མ་བཀྲུས་དྲི་མ་སྤྱོད་འགྱུར་བས།།ཁྲུས་མ་བྱས་པར་ཟས་མི་ཟ།།ཞེས་སྨོས་པའི་དོན་གྱིས་ཁྲུས་ཀྱི་རྗེས་སུ་བདུད་རྩི་ལ་རོལ་ལོ་སྙམ་ནས་ཁྲུས་ལ་སོང་ངོ་།།དེ་སྐབས་བརྒྱ་བྱིན་དང་ཁྱབ་འཇུག་གཉིས་ཀྱིས་བདུད་རྩི་བརྐུས་ནས་བྲོས་ཏེ་ནམ་མཁའ་ལ་འཕགས་སོ།།ལྷ་མ་ཡིན་རྣམས་ཁྲུས་བྱས་ནས་འོང་པས་བདུད་རྩི་སྲུང་མ་བཅས་མེད་པར་མཐོང་ནས་ལྷ་རྣམས་ཀྱིས་ཁྱེར་རོ་ཞེས་ཐོས་ཀྱང་ལྷ་རྣམས་ནམ་མཁའ་ལ་འགྲོ་བས་ཅི་བྱ་མེད་པར་གྱུར།ལྷ་རྣམས་བདུད་རྩི་ལ་ལོངས་སྤྱོད་ཕྱིར་འདུས་པ་ན།ལྷ་མ་ཡིན་གྱི་དབང་པོ་སྒྲ་གཅན་འཛིན་ལྷ་ཡི་ཆ་ལུགས་སུ་སྤྲུལ་ནས་དེར་ཞུགས།བདུད་རྩིའི་སྐལ་བ་ཐོབ་པ་དེ།ཉི་མས་ཤེས་ནས་ཁྱབ་འཇུག་ལ་སྨྲས་ནས་སྦྲན་པས།ཁྱབ་འཇུག་གིས་མཚོན་ཆའི་འཁོར་ལོ་འཕངས་པས་སྒྲ་གཅན་གྱི་མགོ་བོ་བཅད་ཀྱང་།བདུད་རྩི་ཁར་བཏུང་ཟིན་པས་མགོ་ནི་མ་ཤི་ལ།ལུས་ཤི་བར་གྱུར་པས་ཞེ་འགྲས་པས་ཉི་ཟླ་སྒྲིབ་པར་བྱེད་པ་ཡིན་ཞེས་གྲགས་སོ།།སྡེ་སྲིད་ནས་ཡང་སྒྲ་གཅན་གྱིས་འཁོར་ལོ་ཕྱིར་འཕངས་པས་ལྷ་ཚངས་པའི་མཁུར་ཚོས་ལ་ཕོག་པས་རྨ་བྱུང་དེ་ལས་ཨོཾ་ཨཱོ་ཐ་ཞེས་སྒྲ་བྱུང་བས་རིག་བྱེད་བཞི་བྱུང་།ཞེས་ཟེར་ལ།གདོང་བཞི་ལས་རིག་བྱེད་བཞི་བྱུང་བ་ཡང་བཤད་དོ།།དེ་ལ་རིག་བྱེད་བཞི་ནི།ཚེ་ཡི་རིག་བྱེད།སྙན་ཚིག་རིག་བྱེད།ངེས་བརྗོད།མཆོད་སྦྱིན་བཞི་ཞེས་བཤད་ལ་འདྲེན་ཚུལ་གཞན་ཡང་མང་ངོ་།།ལྷ་ཚངས་པས་ཚེ་ཡི་རིག་བྱེད་གསོ་དཔྱད་འབུམ་པ་ཞེས་རྒྱ་མཚོ་ནས་བདུད་རྩི་ཕྱུངས་བའི་རྗེས་ཙམ་ནས་བྱས་པར་གསུངས་སོ།།
གཉིས་པ། གང་ལས་བརྒྱུད་པ།
ཚངས་པ་ཆེན་པོས་གསོ་དཔྱད་དྲན་ནས་ཐོག་མར་རང་གི་བུ་སྐྱེས་དགུའི་བདག་པོ་མྱུར་བ་ཞེས་པར་བཤད།དེས་ལྷ་ཡི་སྨན་པ་ཐ་སྐར་གྱི་བུ་གཉིས་ལ་བཤད་དོ།།དེ་གཉིས་ཀྱི་ལོ་རྒྱུས་ནི།ལྷ་ཡི་དྲང་སྲོང་འོད་ཟེར་ཅན་ལ་ཆུང་མ་དབྱངས་ལྡན་པ་ཞེས་ཡོད་པ་རྟ་རྒོད་མའི་གཟུགས་སུ་སྤྲུལ་ནས་དཀའ་ཐུབ་སྤྱོད་པའི་ཚེ།དྲང་སྲོང་འདོད་པས་གདུངས་ཏེ་ཞོན་པར་བརྩམས་པའི་ཚེ།རྟ་རྒོད་མས་རོ་སྨད་བསྒྱུར་བས་ས་སོན་རྟ་ཡི་སྣ་བུག་ཏུ་སོང་བས་ཐ་སྐར་གཞོན་ནུ་གཉིས་བཙས་སོ།།དེ་གཉིས་ཀྱིས་ལྷ་ཡི་དྲང་སྲོང་རྒན་པོ་ཙ་བ་ན་ཞེས་པ་བུ་མོ་གཞོན་ནུ་དོན་དུ་གཉེར་ཀྱང་མ་འདོད་པའི་ཚེ།ཐ་སྐར་བུ་གཉིས་ཀྱིས་བཅུད་ཀྱི་ལེན་པའི་སྦྱོར་བ་བྱས་པས་རྒན་པོ་ཤིན་ཏུ་གཞོན་ནུ་གཟུགས་བཟང་བར་བྱས་པ་སོགས་ལོ་རྒྱུས་མང་ལ།སྐྱ་གསེང་བུ་ལྔའི་ནང་ཚན་མིན་པར་འདོད་པ་ནི་འཁྲུལ་ལོ་གསུང་།ཐ་སྐར་སྐྱེས་སྤུན་གཉིས་ཀྱིས་ལྷ་ཡི་དབང་པོ་བརྒྱ་བྱིན་ལ་བཤད།བརྒྱ་བྱིན་གྱིས་དྲང་སྲོང་ཆེན་པོ་རྒྱུན་ཤེས་བུ་ལ་བཤད་དེ་རྒྱུན་ཤེས་ཀྱི་བུ་འདི་ཡི་ཕ་ནི་ལྷ་ཡི་དྲང་སྲོང་རྒྱུན་ཤེས་ཀྱིས་བྱ་བ་ཡིན་ལ།མ་ནི་མི་ཡི་བུད་མེད་ཡིན་པར་བཤད་ལ།དེས་ཚངས་པའི་བཤད་པ་བསྡུས་པ་ཞེས་བྱ་བའི་སྨན་དཔྱད་ཀྱི་གཞུང་ཆེན་པོ་བྱས་པ་ཟླ་ཟེར་ལས་བྱུང་ངོ་།།རྒྱུན་ཤེས་བུས་ཐང་ལ་འབར།དཀའ་གཉིས་སྤྱོད།མུ་ཁྱུད་འཛིན།འགྲོ་སྐྱོང་གི་བུ།བཤོལ་འགྲོ་སྐྱེས།ནབ་སོ་སྐྱེས་ཞེས་བྱ་བ་རྣམས་སོ།།ཐང་ལ་འབར་ནི་སྨན་གྱི་བསྟན་བཅོས་ཐམས་ཅད་འཛིན་པའི་མཆོག་དང་།དཀའ་གཉིས་སྤྱོད་ནི་དཀའ་ཐུབ་ཆེན་པོ་སྤྱད་པའི་དྲང་སྲོང་གི་སྨན་པ་ཆེན་པོ་སྟེ།དེ་ཙམ་ལས་འདི་རྣམས་ཀྱི་ལོ་རྒྱུས་ཞིབ་པ་མ་མཐོང་ཞེས་གསུངས།རྒྱུན་ཤེས་བུ་ལ་སོགས་པའི་དྲང་སྲོང་ཆེན་པོ་རྣམས་ཀྱིས་ཀྱང་།དྲང་སྲོང་མེ་བཞིན་འཇུག་དང་།ལུག་ནག་དང་།རྒྱ་སྐྱེགས་སྣ་དང་མདའ་མི་མཆོག་དང་ལན་ཚྭའི་ལག་ལ་སོགས་པའི་དྲང་སྲོང་རྣམས་ལ་སྨན་དཔྱད་བཤད་ཅིང་།དེ་དག་རྣམས་ལས་དྲང་སྲོང་མེ་བཞིན་འཇུག་འདི་མཁས་ཤིང་གྲགས་པ་ཆེའོ།།དེ་དག་ནི་ཚངས་པ་ནས་རིམ་པར་བརྒྱུད་པའི་སྨན་དཔྱད་མཁན་ཡིན་པར་སྙིང་པོ་བསྡུས་པ་འགྲེལ་པ་དང་བཅས་པ་ལས་གསལ་བར་བཤད་དོ།།གཞན་ཡང་།ཚངས་པའི་བུ་ལྷ་ཡི་དྲང་སྲོང་སྨན་པ་རྟག་ཏུ་གཞོན་དང་།རྣམ་བྱེད་ཀྱི་བུ་ཞེས་པ་སོགས་འདོད་འཇོར་བཤད།དེ་ལྟར་ཚངས་པས་བཤད་པའི་གསོ་དཔྱད་ཚེ་ཡི་རིག་བྱེད་ཀྱི་གཞུང་ཤོ་ལོ་ཀ་འབུམ་ཡོད་པ་དང་།སྐྱེ་རྒྱུའི་བདག་པོ་ཐ་སྐར་གྱི་བུ་གཉིས་བརྒྱ་བྱིན་རྟག་གཞོན་རྣམས་ཀྱི་བུ་ལ་སོགས་པ་མཐོ་རིས་ཀྱི་ལྷ་དང་དྲང་སྲོང་རྣམས་ཀྱིས་བྱས་པའི་གསོ་དཔྱད་ཀྱི་རྒྱུད་ཇི་སྙེད་ཡོད་པ་རྣམས་ལས་ཚངས་པས་བཤད་པ་དེ་ལ་དཔལ་ལྡན་རྒྱུད་ལས་ལྷ་ཡི་འཁོར་ལ་གསོ་དཔྱད་འབུམ་པ་གསུངས།ཞེས་སོ།།