༄༅།། གཏར་གའི་ལག་ལེན།
ཡོང་ཁུངས། ཟིན་ཏིག | ཀློག་གྲངས།
གཏར་གའི་སྐབས། རྒྱས་ཚད་ལྟ་བུ་གློ་བུར་གཏར་དགོས་མ་ཡིན་པ་ལ་ངན་ཁྲག་དབྱེ་བའི་ཐང་སྔ་ཉིན་ནས་བཏང་། བླ་གནས་མ་ཐུག་ཅིང་གཟའ་སྐར་འཇམ་སྐབས་འགྲུལ་བསྲུང་། བཏུང་བ་ཡང་འཐུང་། ལུས་དྲོས་ངེས་མེ་ཉི་ལྟ་བུས་བསྲོ། ནད་པ་ལོ་ལྷའི་ཕྱོགས་སུ་གདོང་གཏད་ལ་འདུག གཙག་ལ་ཉེས་སྐྱོན་སྲུང་བའི་སྔགས་བཏབ། བསྙལ་ལུགས་གཞུང་གསལ་ལྟར་བསྙལ་ཐག་གིས་པགས་པ་མ་འཆུས་པར་སྦྲིད་ཆིལ་རྩ་རྒྱུད་ལྟང་མ་བྱུང་བར་སྡམ། དེ་ནས་རྩ་རྒྱུད་རྣམས་རེ་ཞིག་འཕུར་བསུབ་བྱས་ནས་རྩ་གང་ཡིན་དེ་ལ་ལག་པའི་མཐེབ་མཛུབ་ཀྱིས་དམ་པར་བཟུང་ལ་སྨྱུག་ཁ་ལྟ་བུའི་སེན་རིས་བྱས། དེ་སྟེང་གཙག་ས་ཕུག་པས་ཁྲེབ་སྒྲ་གཉིས་བྱུང་ན་ཤ་དང་རྩ་ཕིགས་པའི་རྟགས་ཡིན་པས་བླང་། དེ་ལས་ཐལ་ཏེ་ཤ་གདན་བསྣད་ན་མི་ལེགས་པས་ལག་ཚོད་ཟིན་པར་བྱ། ནད་ཁྲག་ཐོན། ཟུངས་ཁྲག་བྱུང་ནས་བཅད་རན་པས་ན་བསྙལ་ཐག་ཀློད་ལ་རྨ་ཁ་མཐེ་མོས་ཅུང་ཟད་མཉེ། ཕྱིང་པ་ཆུར་བཅུག་པའི་དུམ་བུ་གླན་ལ་བལ་ཐིག་གིས་བསྡམ། ཁྲག་ཆོད་དཀའ་ན་ཤིང་གཞོག་གླན། རྩ་རྒྱུད་རྡོ་གྲང་གཏུགས། འགྲོ་འདུག་ལངས་འགུལ་མི་བྱ་བར་གཟབ། ཁ་ཅིག་ལ་ཁྲག་གིས་བོགས་ནས་དབང་པོ་ཤོར་བ་ཡོད་པ་གསུར་བདུག་བྱ་ཞིང་ཁ་ཕྲུ་གདབ། ཚབས་ཆེ་ན་གསོན་ཁྲག་བླུད་པའང་གསུངས། རྨ་ཁ་སྐྲངས་ན་ཚྭ་མར་དང་ཁྱི་གཞོབ་བྱུགས་ལ་མཉེ། རླུང་སྐྱེས་ན་རླུང་སྨན་དང་བུ་རམ་བཏང་། ཁྲག་ངན་སྐྱེ་བས་ཆང་རག་གཏོང་མི་རུང་། གག་པའི་ལྕེ་ཟོར་སྐབས་ལྕེ་རྩེ་ཟླ་གམ་རིང་ཐུང་ཕུན་གང་ཙམ་ཡོད་པའི་ཕྱེད་ཡན་དར་གྱིས་དཀྲི། དེ་ནས་ལྕེ་སྐྲངས་དབུས་སུ་བཞག་ནས་གྲི་ལྟག་ལྟ་བུས་བརྡེགས་པས་རྣག་དོན་ཡོང་། དྲེག་རྩ་ནི་རྐང་པའི་མཐེ་བོང་དང་མཛུབ་མོའི་བར་གྱི་བདར་ཤ་ན་ཡོད་པས། དྲེག་འབུག་རྣོན་པོའི་བུ་གར་དར་དམར་པོ་བརྒྱུས་ནས་ཕུག་ཅིང་། འབུག་བླངས་རྗེས་དར་སྐུད་ཡར་མར་དྲངས། མཐར་ཞབས་ངོས་སུ་བླངས་ནས་དོར། ཕུག་གདན་འབོལ་ལྟ་བུ་ཞིག་དགོས་སོ།།
