རིན་པོ་ཆེའི་སྨན་སྡེ་ལས་རིན་ཆེན་དངུལ་གྱི་སྐོར།
ཡོང་ཁུངས། <<ཤེལ་གོང་ཤེལ་ཕྲེང་>> | ཀློག་གྲངས།
དངུལ་གྱིས་ཆུ་སེར་ནད་དང་རྣག་ཁྲག་སྐེམ།། ཞེས་པར། རང་བྱུང་རྡོ་རྗེས། དངུལ་གྱིས་སོ་ནི་བཟང་པོར་འགྱུར།། ཞེས་དང་། མན་ངག་ཏུ། དངུལ་ནི་གསེར་དང་ཕྱོགས་མཐུན་ལ།། རོ་ཁ་ཞུ་རྗེས་ཁ་ཡང་སྙོམས།། ཞེས་གསུངས། མིང་ནི། རུ་པྱཾ། དངུལ། ར་ཛ་ཏཾ། ཚོན་ཅན། དུཪྺ་རཾཎ། མདོག ་ངན། བྷངྒ་པི་ཛ། འཁྱོག་པའི་ས་བོན་དང་། ཤྭེ་ཏ་ཁརྫུ་ར། ཁརྫུ་རཾ་ཤྭེ་ཏཾ། དཀར་པོ། ཙནྦྷ། ཨིནྡྷུ། དྷ་ར། རུ་པ། རཱུ་པ། ཨརྦ་ཊཾ། རཱ་ཏེ། ཞེས་དང་གབ་ཏུ། རྡོ་སྙིང་། རྒྱ་ནག་གིས་ཡི་འཛི། ཧོར་གྱིས་མུན་འགུ། བྱུང་བྱུངངས་ས་ལས་བྱུང་བ་དང་། ཤིང་ལས་བྱུང་བ་དང་། རྡོ་ལས་བྱུང་བ་གསུམ་ཡོད། ས་ལས་བྱུང་བ་ནི། ཛམྦུ་གླིང་གི་གླིང་ཕྲན་གཞན་པ་ཨ་ལ་ཡི་ཞེས་བྱ་བའི་ཡུལ་དུ་ས་བྲུས་པའི་ནང་དུ་ཆར་བབས་པའི་རྐྱེན་གྱིས་ཆབ་རོམ་ལྟར་ཆགས་པར་བཤད་པའོ།། དེ་ནི་མཆོག་ཏུ་བཤད། ཤིང་ལས་བྱུང་བ་ནི། ཁྭ་ར་ས་ནའི་ཡུལ་དུ་ཤིང་གི་སྡོང་པོ་རུ་པ་ད་རུ་ཞེས་པ་བསྲེགས་པ་ལས་ཞུན་དུ་བབས་ནས་ཆགས་པར་བཤད་པའོ།། རྡོ་ལས་བྱུང་བ་ནི། དངུལ་རྡོ་སྔོན་པོ་ཕྲོམ་པ་དེ་བཞུས་པ་ལས་འབྱུང་། དེ་ཡང་རྡོ་རིགས་ཀྱི་ཁྱད་པར་ལས་རྡོ་བཞུས་པ་ནས་དངུལ་འབབ་པ་དང་། རྡོ་བཞུས་པས་དང་པོ་ལྕགས་འབབ་པ་དང་། གཤའ་འབབ་པ་དང་། ཞ་ཉེ་འབབ་པ་དང་། ཟངས་འབབ་པ་སྟེ། དེ་བཞི་གང་ཡང་སླར་བཞུ་བཏུལ་བྱས་པས་སྔ་མ་དག་ནས་དངུལ་འདུག་པའི་རིགས་ཏེ། ནད་ལ་ཡང་རང་རང་གི་མ་དང་མཐུན་པར་ཕན་གསུངས།
རྒྱུད་རིན་ཆེན་སྤུངས་པ་ལས། དངུལ་ནི་མཚལ་ལས་བྱུང་བ་ཡིན། ཞེས་གསུངས་པ། དངུལ་རང་དུ་བྱེད་མཁན་འདུག་ཀྱང་། འདི་དངུལ་ཆུ་ལ་གསུངས་པ་ལས་དངུལ་དུ་དགོངས་པའི་ཁུངས་མ་མཐོང་ངོ་། དེ་དག་རྒྱུའི་སྒོ་ནས་ས་དངུལ། ཤིང་དངུལ། རྡོ་དངུལ་ཞེས་འབོད་པར་གྲགས་ཀྱང་། བོད་དུ་རྡོ་དངུལ་འབའ་ཞིག་ལས་མི་འབྱུང་ལ། དེར་ཡང་། ལྕགས་དངུལ་སྔོ། གཤའ་དངུལ་དཀར། ཞ་དངུལ་ཁམ། ཟངས་དངུལ་དམར་ཟེར། འོན་ཀྱང་དེང་སང་བོད་ཆེ་ཆུང་དུ་འབྱུང་བ་འདི་ལ་ར་དངུལ་ལུག་དངུལ་གཉིས་སུ་འདུས། ར་དངུལ་སྔོ། ལུག་དངུལ་དཀར་བའོ།། དེ་ཡང་ཧོར་དངུལ་ཤིང་ཁ་མ་བཟོ་དབྱིབས་མ་ངེས་པ་དང་། རྒྱ་དངུལ་འོ་ཁ་མ་སྟེ་འདི་ལ་བོད་དངུལ་བསྲེས་པ་མང། དེ་ལ་དབྱིབས་ཁྱད། རྒྱ་ནག་གི་རྟ་རྨིག་མ། ལུག་རྨིག་མ། ར་རྨིག་མ། རྟ་དྲས་མ། ཡིག་ཕྭན་སོགས་དང་། རྒྱ་གར་ཊཾ་ག་ཡུལ་ཁྱད་ཀྱིས་གྲུ་བཞི་ཟླུམ་པོ་གཉིས་ལ་ཞོ་གསུམ་རེ་ཡོད་པ། བལ་པོའི་ཊཾ་ག་ཞོ་ཕྱེད་དང་དོ་རེ་ཡོད་པ། དེར་ཡང་ཡམ་བུ་དང་། ཡེ་རང་དང་། ཁོ་ཁོམ་གསུམ་པོའི་རང་རྟགས་ཁ་རིས་དང་། རེ་རེར་ཡང་རྒྱལ་རབས་རེ་རེ་བཞིན་གྱི་རྟགས་ཁ་ཡིག་ཨངྐི་ལོ་རྟགས་བཅས་གསལ་བ་དང་། ནང་པ་ལ་རང་རྟགས་མཆོད་རྟེན། ཕྱི་པ་ལ་དབང་ཕྱུག་གི་རྩེ་གསུམ། ཐུན་མོང་ལ་འདྲེས་པ། ཆོས་རྒྱལ་བ་སུ་དྷ་རའི་བསྒྲུབ་པའི་མཎྜལ་རྟེན་མདའ་གཞུ་བྲིས་པ་སོགས་དང་། དེ་བཞིན་མོན་ཊཾ་ཞེས་ཞོ་རེའི་ཚད། རྒྱ་སེར་གྱི་འདྲ་མིན་སྐར་རེ་ལངས་པ་རྣམས་ནི་ར་དངུལ་ཡིན་པར་བཤད། ཁམས་དངུལ་ཞོ་ཁ་མ་ལའང་དངུལ་ཁ་མང་སྟབས་མི་འདྲ་བ་ཅུང་འབྱུང་ཡང་རིགས་གཅིག་པར་བྱེད་པ་དང་། གཞན་རྡོ་དངུལ་ནས་ཟངས་ཀྱི་བར་རྣམས་ལས་ལྕགས་དངུལ་མ་གཏོགས་པ་སྟེ་དེ་དག་ལུག་དངུལ་དུ་བརྩི་བ་གཞུང་གི་རྩིས་ལུགས་སོ།།
