མཁས་དབང་བློ་བཟང་དམ་ཆོས་མཆོག་ནི། སྤྱི་ལོ་༡༩༢༦ལོ་སྟེ་རབ་བྱུང་བཅོ་ལྔ་བའི་སྲེད་པ་མེ་སྟག་ལོའི་ཧོར་ཟླ་དྲུག་པའི་ཚེས་བཅུ་ཉིན་གྱི་ཐོ་རངས་སྟག་གི་དུས་ཚོད་དུ་ཡུལ་མདོ་སྨད་ཀྱི་བྱང་ཕྱོགས་དགུ་འགྱུར་པད་མོ་རོང་ཀྱི་ནང་ཚན་དགུ་རོང་ཕུ་ཞེས་པའི་སྔགས་སྡེ་ཞིག་ཏུ་ཕ་མགོན་པོ་རྒྱལ་དང་མ་བྱང་ཆུབ་སྒྲོལ་མ་ཞེས་པ་གཉིས་ཀྱི་སྲས་སུ་སྐུ་འཁྲུངས། བྱིས་པའི་མཚན་ལ་ཆོས་སྐྱོང་སྐྱབས་སུ་འབོད། རང་ལོ་ལྔ་དྲུག་ཙམ་ནས་ཕ་མགོན་པོ་རྒྱལ་ལས་ཡི་གེ་འབྲི་ཀློག་གི་དབུ་ཚུགས་པ་དང་མཉམ་དུ་རྙིང་མའི་ཁ་བཏོན་གྱི་སྐོར་བསླབ་མགོ་བརྩམས་ཤིང༌། མཚན་ལ་ཚུལ་ཁྲིམས་གསོལ་བའི་ཨ་ཁུ་བསམ་གྱིས་མི་ཁྱབ་པ་ཞིག་ཡོད་པའི་དེའི་སྐུ་མདུན་ནས་སྙིང་ཐིག་སྔོན་འགྲོ་དང༌། སེང་གདོང་བདུད་རྩི་ནག་མོ། བཀའ་ཐང་ཤེལ་བྲག་མ་སོགས་རྙིང་མའི་འདོན་པ་ཆ་ཚང་དང༌། གཞན་གསེར་འོད་དམ་པ་མདོ་སྡེ་དབང་གི་རྒྱལ་པོ་བཅས་བསླབ་ཤིང་ཐུགས་འཛིན་མཛད། སྐུ་ན་ཕྲ་དུས་ནས་བློ་རིག་བཀྲ་ཤིང་བག་ཆགས་བཟང་པོའི་མཐུ་ཡིས་རྟགས་དང་རྟེན་འབྲེལ་ངོ་མཚར་ཅན་དུ་མ་མཐོང་མྱོང་ཞིང༌། ཉིན་རེའི་ཞོགས་པར་དཔེ་ཆ་སྣ་རིང་ཐུང་ཤོག་ངོས་བཅུ་རེ་བློར་འཛིན་ཐུབ་པ་དང་དཔེ་ཆ་གང་ཞིག་ཚར་གཅིག་ཙམ་བསླབ་པས་མགྱོགས་པོར་ཤེས་འགྲོ་བ་བཅས་འབྲི་ཀློག་དང་ཆོས་སྤྱོད་འདོན་ཆ་མང་པོ་ཚེགས་མེད་ངང་མཁྱེན། ཐེངས་ཤིག་དགུ་རོང་ཕུའི་སྡེ་བ་གོང་འོག་ལྷན་འཛོམས་ཀྱིས་རྟ་མགྲིན་གྱི་བཟློག་པ་འཛུགས་པའི་ཆོ་གའི་ཉིན་མོ་ཞིག་ལ། ཨ་ཁུ་གཡག་ལོ་ཞེས་པའི་རྒད་པོ་མཁས་པ་ཞིག་ཡོད་པ་དེས་མགོ་བོ་གཡུག་ཞོར་དུ་དེང་སང་རྨ་ཆུ་ཕར་རོལ་ཚུར་རོལ་ཏུ་འདི་ལྟ་བུའི་བྱིས་པ་འདོན་ལེགས་འདོན་བཟང་ཞིག་ཡོད་རྒྱུ་མ་རེད་ཅེས་བསྔགས་བརྗོད་བྱས།
སྤྱི་ལོ་༡༩༨༣ལོར་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གྱི་སློབ་གསོའི་ལོ་རྒྱུས་སུ་ཐེངས་དང་པོར་བསྒྲུབས་པའི་བོད་སྨན་འཛིན་གྲྭའི་གསོ་རིག་དགེ་རྒན་གཅིག་ལྕོགས་ཀྱི་འགན་བཞེས་ཏེ་དཔལ་ལྡན་རྒྱུད་བཞི་དང་མན་ངག་ལྷན་ཐབས་བཅས་སྲོལ་རྒྱུན་ཇི་བཞིན་དཔེ་ཁྲིད་ཆ་ཚང་གནང་བ་དང༌། ༡༩༨༥ལོའི་སྤྱི་ཟླ་དགུ་བར་མཚོ་སྔོན་མི་རིགས་དགེ་འོས་ཆེད་སྦྱོང་སློབ་གྲྭ་ཉིད་མཚོ་ལྷོ་ཆབ་ཆར་གསར་དུ་ཚུགས་རྗེས་སློབ་གྲྭ་དེ་གའི་སློབ་དཔོན་ཆེན་མོར་ཕེབས་པ་དང༌། ༡༩༨༦ལོའི་ལོ་སྟོད་དུ་འབྲེལ་ཡོད་མགོ་ཁྲིད་དང་ལྷན་དུ་རྒྱ་ནག་པེ་ཅིན་ལ་ཆིབས་བསྒྱུར་གྱིས་ཀུན་གཟིགས་༧པན་ཆེན་སྐུ་ཕྲེང་བཅུ་བ་མཆོག་མཚོ་སྔོན་མི་རིགས་དགེ་འོས་ཆེད་སྦྱོང་སློབ་གྲྭའི་མཚན་འཛིན་སློབ་གཙོ་རུ་གདན་ཞུ་ལྟར་སྣང་བ་མཐའ་ཡས་མཆོག་གིས་ཞལ་གྱིས་བཞེས་ཤིང་བཀའ་སློབ་གསུང་མོལ་མང་དུ་བསྩལ།
དེ་ཡང་མཁས་དབང་འདི་བ་མཚོ་སྔོན་ཞིང་ཆེན་མཚོ་ལྷོ་ཁུལ་དུ་བཞུགས་ཡུན་གྱི་དུས་ཚོད་ནང་དུ། རྒན་ཁོང་ཉིད་གཙོ་བྱས་པའི་སྐབས་དེའི་འབྲེལ་ཡོད་མགོ་ཁྲིད་དང་དགེ་སློབ་ཡོངས་ཀྱི་ཐུགས་བསྐྱེད་བཟང་པོའི་སྨོན་ལམ་དང༌། དགེ་སློབ་ལྷན་རྒྱས་ཀྱི་བསམ་པ་གཅིག་ཏུ་འབྲེལ་ཞིང་ནུས་རྩལ་ཡོད་རྒུ་རྩལ་དུ་སྤྲུགས་ཏེ་བོད་ཀྱི་རིག་གནས་སློབ་གསོ་སྤེལ་བའི་ལས་ལ་གཞོལ་བའི་ཁོར་ཡུག་བཟང་པོ་ཞིག་ལྷུན་གྱིས་གྲུབ་ཡོད་པ་བཅས་རྒྱུ་རྐྱེན་རྟེན་འབྲེལ་མཐའ་དག་གཅིག་ཏུ་འཛོམས་པའི་དབང་གིས་བཅིང་འགྲོལ་བྱས་ཚུན་ནམ་རིག་གནས་ཡང་དར་གྱི་ཚུན་ལ་མཚོ་ལྷོ་ཁུལ་བོད་ཀྱི་སློབ་གསོའི་ལོ་རྒྱུས་སྟེང་སུམ་རྟགས་ནས་བཟུང་ཏེ་སྒྲ་སྙན་ངག་དང༌། རྩིས་ས་རིས། གསོ་རིག་རྒྱུད་བཞི་སོགས་སློབ་ཁྲིད་ཆ་ཚང་བྱས་མྱོང་མེད་པའི་སྟོང་ཆ་ཆེན་པོ་ཞིག་ཁ་སྐོང་གནང་ཐུབ་པ་བྱུང་ལ། མཁས་དབང་ཁོང་ཉིད་མཚོ་སྔོན་ཞིང་ཆེན་མཚོ་ལྷོ་ས་ཆའི་བོད་ཀྱི་སློབ་གསོ་སློབ་ཁྲིད་ཀྱི་དེད་དཔོན་ཆེན་མོའམ་སྒྲོན་མེ་འབའ་ཞིག་ཏུ་གྱུར་ནས་མཚོ་ལྷོའི་སློབ་གསོ་བྱ་བཞག་ལ་གཡུར་དུ་ཟ་བའི་གྲུབ་འབྲས་རླབས་པོ་ཆེ་ཐོབ།
མཁས་དབང་འདིའི་གསུང་རྩོམ་ལ། ཐོན་མིའི་ཞལ་ལུང་གི་དོགས་སློང་དང༌། སྙན་ངག་གི་རྒྱན་གྱི་བསྟན་བཅོས་མེ་ལོང་ལ་འཇུག་ཚུལ་རྣམ་བཤད་བྱིས་པའི་དགའ་ཚལ། གསོ་རིག་རྒྱུད་བཞིའི་མཆན་འགྲེལ་རྒྱུད་དོན་རབ་གསལ། དངོས་གྲུབ་ཀུན་གྱི་གཞི་རྟེན་སྡོམ་གསུམ་བླ་མའི་ཞལ་སྐྱིན། དཔལ་རྡོ་རྗེ་འཇིགས་བྱེད་ཀྱི་མཆན་འགྲེལ། དག་ཡིག་ཤེས་བྱ་རབ་གསལ་གྱི་མཆན་འགྲེལ། ཆབ་ཤོག་གི་སྐོར། པཎ་ཆེན་རིན་པོ་ཆེ་མཚོ་ལྷོར་ཕེབས་པའི་ལེགས་མཛད་ངོ་མཚར་རྟོགས་བརྗོད་རིན་ཆེན་གསུམ་པའི་མེ་ཏོག  བཀའ་དྲིན་གསུམ་ལྡན་གྱི་རྩ་བའི་བླ་མ་རྡོ་རྗེ་འཆང་བློ་བཟང་འཕྲིན་ལས་རྒྱ་མཚོའི་རྣམ་ཐར། སྐར་རྩིས་མྱོང་བྱང༌། གཡང་འཆར་གྱི་མྱོང་བྱང༌། འཇུ་མི་ཕམ་པའི་མཁས་འཇུག་གི་མིང་ཚན་འགའ་རྣམ་པར་བཀྲལ་བ་བདུད་རྩིའི་ཟེགས་མ། ཞིང་སྐྱོང་དུར་ཁྲོད་ལྷ་མོའི་གསོལ་མཆོད་བསྡུས་པ་བྱུང་རྒྱུས་དང་བཅས་པ་སོགས་མང་དུ་བཞུགས་སོ། །