སྨན་པ་བེེ་ཚ་འཇམ་ཚེ་ནི་རྨ་ཀླུང་གསེར་ལྡན་རིང་མོའི་མགོ་ཁུངས་ཏེ་གནམ་མགོ་ལོག་དང་ས་མགོ་ལོག་ཅེས་པའི་སྙན་པ་ཕྱོགས་བཅུར་རྒྱས་ཤིང་ས་ལ་དགེ་བཅུའི་དཔལ་དང་ལྡན་པའི་ཡུལ་ཁམས།དེང་དུས་དར་ལག་རྫོང་ཞེས་འབོད་པའི་ཡུལ་དེའི་མཁའ་རི་ཞེས་པའི་ས་ཆ་ནས་ཡབ་བེེ་ཚ་འུག་རྒན་ཞེས་པ་དང་ཡུམ་སྒྲོལ་མ་འཚོ་གཉིས་ཀྱི་སྲས་སུ་སྤྱི་ལོ་༡༩༣༧ལོ་སྐུ་འཁྲུངས། རང་ལོ་དྲུག་ནས་མཚན་ལྡན་བླ་མའི་ཞབས་ལ་གཏུགས་ཏེ་ཡི་གེ་འབྲི་ཀློག་གི་མགོ་བརྩམས། དགུང་ལོ་བཅུ་དྲུག་སྟེང་མགོ་སྨན་ཆོས་འཛིན་ཞེས་པའི་མཁས་པའི་དབང་བོར་གྱུར་བ་དེ་ཉིད་དགེ་རྒན་དུ་བསྟེན་ནས་བཟུང་སྒྱིད་ལུག་པའི་ལེ་ལོ་དང་།བྱ་བ་ངན་པའར་ཞེན་པའི་ལེ་ལོ།དགེ་བའི་ལས་ལ་ཕྱི་བཤོལ་བའི་ལེ་ལོ་བཅས་འཕྲལ་ཡུན་གྱི་བདེ་ལེགས་ཚོགས་མ་ལུས་འབྱུང་བའི་གེགས་སུ་གྱུར་པའི་ལེ་ལོའི་རྣམ་པ་གསུམ་རིང་དུ་སྤངས་ཏེ།ཡོན་ཏན་མ་ལུས་རྗེས་སུ་འགྲོ་བའི་རྟག་གུས་ཀྱི་བརྩོན་པ་ཆུ་བོའི་རྒྱུན་བཞིན་བསྟེན་ནས་རྩ་རྒྱུད་དང་བཤད་རྒྱུད། མན་ངག་རྒྱུད། ཕྱི་མ་རྒྱུད་བཅས་གསོ་རིག་དཔལ་ལྡན་རྒྱུད་བཞི་ལ་སྦྱང་བ་དཔྱིས་ཕྱིན་པ་གནངས། དེའི་རྗེས་རང་གི་ཁུ་བོ་བེེ་ཚ་ཐར་བའི་དྲུང་ནས་སྨན་ངོ་ངོས་འཛིན་ལ་སོགས་དམིགས་བུས་ལོང་ཁྲིད་བཞིན་དུ་ལག་ལེན་དམར་ཁྲིད་གནང་བ་ལའང་སློབ་སྦྱོང་གི་མཐའ་འཁྱོལ་བར་བྱས་པ་དང་། མགར་བ་སྨན་པ་བྲུག་ལིའི་དྲུང་ནས་སྨན་རྫས་ངོས་འཛིན་དང་སོ་སོའི་ཐུན་མོང་དང་ཐུན་མོང་མ་ཡིན་གྱི་དུག་འདོན་འཇམ་བཙལ་འཕྲོད་སྦྱོར་ལ་སོགས་ཡོངས་སུ་གསན་ཏེ་སྨན་སྣ་གང་གི་འདུལ་སྦྱོང་དང་སྡེབ་སྦྱོར་བཅས་ལ་རང་རྐྱང་འཕེར་བའི་ཡོན་ཏན་ལྡན་པར་བྱས།  གཞན་དུ་དགེ་བའི་བཤེས་གཉེན་གྱི་དེད་དཔོན་གང་གྲགས་ལ་བསྟེན་ནས་ཆོས་ཐམས་ཅད་རིག་པས་གཏན་འབེབས་པའི་བསྡུས་གྲྭ་དང་བརྡ་སྤྲོད་པའི་བསྟན་བཅོས་ཀུན་བཟང་དགོངས་རྒྱན། ལྔ་བསྡུས་ཀྱི་ས་རིས་བློ་ལྡན་ཡིག་གསར་སོགས་ཡིག་གཟུགས་འབྲི་སྟངས། ཞྭ་དམར་ལམ་རིམ་དང་དེའི་ཟིན་བྲིས་ཕན་བདེ་ཀུན་སྟེར་སོགས་ལ་གསན་བསམ་ཕུན་སུམ་ཚོགས་པ་གནང་ནས་རིག་གནས་ཆེ་ཆུང་ཀུན་མཐོང་ཐོས་ཙམ་མམ་བག་ཆགས་ཙམ་དུ་མ་ལུས་པར་བྱང་ཆུབ་པར་བགྱིས།  དེ་ལྟར་རིམ་བཞིན་ཐོས་གོམས་ཀྱི་སྦྱངས་བ་ལ་ཞེན་པའི་འདུན་པའམ་སྔོན་བསགས་བསོད་ནམས་བཟང་བོའི་ལས་མཐུ་ཆེན་པོའི་འོག་དགུང་ལོ་ཉི་ཤུའི་སྟེང་སྨན་རྩིས་མཁས་དབང་ཆེན་མོ་སྟག་ལྷ་ནོར་བུའི་མདུན་ནས་དཀར་ནག་རྩིས་གསུམ་ལ་སྦྱང་བ་བྱེད་པའི་སྐལ་བཟང་ཐོབ་ཅིང་། ལྷག་ཏུ་གསོ་བ་རིག་པའི་སྐོར་ནས་མན་ངག་རྒྱུད་དང་ལེགས་བཤད་གསེར་ཐུར་བཅས་ལ་མཁས་པ་ཆེན་པོའི་གཞན་དྲིང་མི་འཇོག་པའི་དགོངས་པ་དྲི་མ་མེད་པ་དག་རྒྱུད་ལ་འབྱོར་བའི་མཐུན་རྐྱེན་རྙེད་དཀའ་བ་དང་འཕྲད་པས་ཉིན་མཚན་དབྱེར་བ་མེད་པར་གསོ་བ་རིག་པའི་ཤེས་བྱ་ཀུན་ལྟོགས་པའི་ཟས་དང་སྐོམ་པའི་ཆུ་བཞིན་ཏུ་བསྟེན། དགུང་ལོ་སོ་གཅིག་གི་སྟེང་ཁམས་གཙང་སྨན་པ་འབྲུག་རྒྱལ་ཞེས་ས་གསུམ་དུ་སྙན་པ་ཆེས་ཆེར་རྒྱས་པའི་སྨན་པ་ཆེན་པོ་དེའི་ཞབས་འོག་ཏུ་བཅར་བའི་དུས་འགྲིག་སྟེ། དེའི་སྐུ་མདུན་ནས་དཔལ་ལྡན་རྒྱུད་བཞི་གཙོ་བྱས། དེའུ་དམར་ཤེལ་གོང་ཕྲེང་ལ་སོགས་ཁྲིབ་གཞི་གཙོ་བཟུང་ནས་ཆུང་དཔྱང་གཏར་བསྲེག་དུགས་ལུམས་ལ་སོགས་གཞུང་དང་ལག་ལེན་ཡོངས་སུ་ཞིབ་ཅིང་རྒྱས་པར་གསན།
དེ་བཞིན་བཤེས་གཉེན་བཟང་བོའི་ཐུགས་འོག་ནས་མ་འདོར་བ་དང་། རང་རྒྱུད་སྒྱིད་ལུག་དང་ལེ་ལོ་ཡིས་མ་གོས་པའི་སྤྱོད་བཟང་འོག་སྨན་པའི་བྱ་གཞག་ལ་དལ་བྲེལ་མེད་པར་གཉེར་བས་རིམ་གྱིས་གདུལ་བྱའང་མང་དུ་འཕེལ་བ་དང་། སྤྱི་ལོ་༡༩༨༤ལོར་སྲིད་གཞུང་གིས་གདན་ཞུས་ལྟར་པད་མ་རྫོང་བོད་སྨན་ཁང་དུ་གསོ་རིག་གི་ལས་ཀ་སྒྲུབ་པར་ཕེབས་ནས་ས་གནས་དེ་གའི་མི་དམངས་ཀྱི་ལུང་ཕུང་བདེ་ཐང་གི་བྱ་གཞག་ལ་བློ་རྩེ་གཅིག་ཏུ་སྒྲིམ། སྐབས་དེར་ཁོང་གིས་ཉམ་ཐག་ནད་པ་མང་བོའི་སྡུག་བསྔལ་སེལ་དགོས་ན་མི་རེ་གཉིས་ཀྱི་ཕན་ནུས་ལ་རེ་བ་ནི་ཐབས་རྡུགས་སུ་མཐོང་སྟེ། རྒན་འདིས་བརྩེན་ལེན་འོག་རྫོང་རིམ་པའི་གསོ་རིག་ཟབ་སྦྱོང་འཛིན་གྲྭ་བསྟུད་མར་ལོ་འགར་བསྡུས་ཤིང་།  ཁོང་ཉིད་ཀྱིས་དངོས་སུ་དགེ་རྒན་དང་སྨན་པའི་བྱ་བ་གཅིག་ལྕོགས་སུ་ཁུར་ནས་དཔ་ཁྲིད་དང་སྨན་བཅོས་འཇགས་པ་མེད་པར་གནངས་པ་འདིའང་མགོ་ལོག་ས་ཁུལ་འཕྲོད་བསྟེན་བྱ་གཞག་གམ་བོད་ལུགས་གསོ་བ་རིག་པའི་འཕེལ་རྒྱས་ལ་མི་སྒེར་གྱིས་བཞག་པའི་གྲུབ་འབྲས་མི་དམན་པ་ཞིག་ཡིན་སྲིད་ལ། ལྷག་ཏུ་སྨན་རྩིས་ཟུང་དུ་འབྲེལ་བའི་ཐུན་མིན་གྱི་ཁྱད་ཆོས་དང་།  བཤེས་གཉེན་ཐུགས་རྗེ་ཅན་དག་གིས་བྱིན་བརླབས་ཀྱི་ཚན་ཁ་མ་ཡལ་བའི་ཆིག་བརྒྱུད་ཀྱི་གདམས་ངག་མང་དུ་བསྩལ་བའི་བཀའ་དྲིན་དུ་མི་འདོད་ན་ཟུག་གིས་མནར་བའི་བའི་འགྲོ་བ་མང་ལ་ཕན་ཐོགས་བླ་ན་མེད་པ་བྱུང་ཞིང་། གཞན་ད་དུང་གསོ་རིག་ལ་མོས་པའི་ཕྱོགས་ཀྱི་སློབ་མ་མང་བོས་ཀྱང་རྒྱུ་སྐར་དབུས་ཀྱི་ཟླ་བ་བཞིན་ཁོང་ཡོངས་སུ་བསྐོར་ནས་གསོ་བ་རིག་པར་བརྩོན་པ་ཆེར་བསྐྱེད་བཞིན་བཞུགས་འདུག་པའང་སྨན་པ་བཟང་པོའི་འཕྲིན་ལས་རབ་ཏུ་རྒྱས་པའི་དན་རྟགས་ཁོ་ནའོ།།  སྤྱི་ལོ་༢༠༡༡ལོར་རྒན་ལགས་བགྲང་བྱ་བདུན་ཅུ་དོན་བཞིའི་ཁུར་གྱིས་ལྕི་ཡང་སེམས་ཤུགས་ཆེན་པོའི་ངང་མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་གིས་གདན་ཞུས་ལྟར་དེར་བཞུགས་ཀྱི་དགེ་རྒན་ཆེན་མོ་རྣམས་དང་། འབུམ་རམས་དང་རབ་འབྱམས་ཞིབ་འཇུག་སློབ་མ། གཞན་ཕྱོགས་ཡོངས་ནས་འདུས་པའི་སྨན་པ་བཅས་བོད་ལུགས་གསོ་རིག་ལས་བྱེད་མི་སྣ་བརྒྱ་ལྷག་ལ་ཟླ་གཅིག་རིང་ཤེལ་གོང་ཕྲེང་གཙོས་དཔེ་ཁྲིད་བསམ་གྱིས་མི་ཁྱབ་པ་གནང་སོང་བ་དེའང་ཁོང་གིས་ཐོག་མཐའ་བར་གསུམ་དུ་གསོ་བ་རིག་པའི་འཕེལ་རྒྱས་ལ་བཅངས་པའི་བསམ་པ་ཉག་གཅིག་ལས་འདའ་མི་སྲིད།
 རྒན་འདི་༡༩༩༡ལོར་ལས་འཁྱུར་ངལ་གསོ་བྱས་ཟིན་མོད། ཉམ་ཐག་འགྲོ་བའི་ཟུག་རྔུ་སེལ་བ་དང་།  སྨན་སྦྱོར་གྱི་གདམས་པ་རིས་མེད་ཀྱི་འགྲོ་ལ་སྤེལ་བའི་གདུལ་བྱ་རྗེས་སུ་འཛིན་པ་ནི་ནམ་ཡང་སྒོ་འཕར་ཡངས་པོར་ཕྱེས་ཡོད་པ་དེ་བཞིན་དུ་ད་དུང་མགོ་ལོག་ས་ཁུལ་དུ་བོད་ལུགས་གསོ་བ་རིག་པའི་བསྟན་པ་གོང་སྤེལ་ལ་ཞབས་ཞུ་གང་ནུས་སྒྲུབ་པའི་བསམ་བློ་ནི་མི་འགྱུར་རི་རྒྱལ་ལྷུན་པོའི་ངང་ཚུལ་བཞིན་རྟག་བརྟན་དུ་བཞུགས་ཡོད་དོ།།